Inicio > Delegacións > Delegacións do Goberno > Delegación do Goberno na Comunidade Autónoma de Galicia > Actualidade > Notas de Prensa > Notas > 2022 > Marzo > José Miñones reafirma a aposta do Goberno pola transformación sustentable do turismo galego co anuncio dun novo investimento de 2 *M€ no Concello de Baiona

José Miñones reafirma a aposta do Goberno pola transformación sustentable do turismo galego co anuncio dun novo investimento de 2 *M€ no Concello de Baiona

30/03/2022

A achega estatal, que promove o turismo verde e patrimonial en Baiona, posibilitará a *renaturalización da contorna de Santa *Liberata, a posta en marcha dun sistema de aluguer de bicicletas e a mellora do carril bici, así como a creación dun novo aparcadoiro disuasorio

O Ministerio de Industria, Turismo e Comercio apoiou con 29,3 millóns de euros 13 proxectos de concellos galegos que buscan modernizar e transformar o modelo turístico da Comunidade

José Miñones anima a todos os concellos de Galicia a participar na nova convocatoria extraordinaria dos Plans de Sustentabilidade Turística, anunciada onte, e que permanecerá aberta desde o 1 de abril ata o 17 de maio

O delegado do Goberno en Galicia, José Miñones, reafirmou hoxe a aposta do Goberno pola cohesión territorial e o impulso ao turismo sustentable de Galicia e puxo como exemplo a achega de 2 millóns de euros do Ministerio de Industria para o desenvolvemento do Plan de Sustentabilidade Turística do Concello de Baiona. O de Baiona é un do trece Plans que subvenciona o Goberno de España en Galicia ao amparo do primeiro Programa Extraordinario dos Plans de Sustentabilidade Turística en Destino e con cargo aos fondos do Plan de Recuperación, Transformación e *Resiliencia do Goberno.

José Miñones achegouse esta mañá á contorna da igrexa de Santa *Liberata, no concello de Baiona, para coñecer de primeira man a actuación de *renaturalización da zona da capela, unha das accións proxectadas no Plan e subvencionada polo Goberno. Alí estivo acompañado polo alcalde do municipio, Carlos Gómez, e pola subdelegada do Goberno en Pontevedra, *Maica *Larriba.

Durante a súa visita, José Miñones destacou que o Goberno busca con estes investimentos pór en valor os recursos patrimoniais de Baiona e promover un turismo máis verde e unha mobilidade máis eficiente. Neste sentido, o delegado destacou a importancia desta “achega histórica, que permitirá ao Concello liderar accións que contribúan a mellorar a competitividade e calidade do sector e a apontoar a súa posición como referente do turismo galego”.

O Plan de sustentabilidade turística de Baiona

O delegado do Goberno explicou que o Plan presentado polo Concello de Baiona busca *desestacionalizar o turismo e facer desta localidade un destino máis verde, máis competitivo e máis sustentable mediante a mellora do seu carril bici, a posta en marcha dun sistema de aluguer de bicicletas, a creación dun aparcadoiro disuasorio e a *renaturalización da contorna de Santa *Liberata. As actuacións enmárcanse dentro da primeira convocatoria extraordinaria dos Plans de Sustentabilidade Turística e deberán *ejecutrarse entre 2022 e 2024.

José Miñones informou de que esta non é a única actuación do Plan de Recuperación do Goberno que se está levando a cabo no municipio, xa que o Programa Único do Ministerio de Asuntos Económicos e Avance Dixital permitirá a 267 vivendas e empresas da localidade contar con conexión a Internet de banda larga. “Ambos os investimentos —subliñou o delegado— evidencian o compromiso deste Goberno co municipalismo e coa cohesión social e territorial”.

720 *M€ na segunda convocatoria extraordinaria de Plans de Sustentabilidade

O delegado do Goberno quixo, así mesmo, animar a todos os concellos galegos a que participen na segunda convocatoria extraordinaria dos Plans de Sustentabilidade Turística. Esa segunda convocatoria, que foi anunciada onte pola ministra de Industria, Turismo e Comercio, Reyes *Maroto, permanecerá aberta do 1 de abril ao 17 de maio e contará cun orzamento de 720 millóns de euros.

A primeira convocatoria extraordinaria permitiu financiar 13 proxectos en Galicia por un importe de 29,3 millóns de euros.