María Rivas destaca en Brión o éxito do *pograma A Administración Preto de Ti na provincia da Coruña, a cuarta en número de asistentes e certificados dixitais en toda España
24/03/2023
Cada semana, persoal técnico da Administración desprázase aos concellos da provincia con menos de 8.000 habitantes para tramitarlles o certificado dixital e axudarlles a realizar outro tipo de xestións administrativas
Desde o mes de novembro participaron neste programa un total de 1.085 persoas e tramitáronse 894 certificados dixitais. Nos próximos meses entrará en funcionamento a segunda fase do plan que na Coruña conta xa con 17 concellos adheridos
A subdelegada do Goberno na Coruña, destacou hoxe en Brión, o éxito total da Administración Preto de Ti na provincia que percorreu xa un total de 64 concellos dos 67 programados e que completará coa visita da próxima semana aos *municipos restantes.
Segundo os últimos datos de febreiro, a provincia da Coruña é a cuarta do territorio nacional en números de asistentes, con 252, e en certificados dixitais tramitados en toda España. Desde o mes de novembro no que arrincou o programa na provincia participaron xa 1.085 persoas e tramitáronse 894 certificados dixitais.
María Rivas adiantou estes datos durante a súa visita ao concello de Brión onde estivo acompañada polo alcalde Pablo Lago para presentar A Administración Preto de Ti que hoxe chegou o municipio.
María Rivas, destacou hoxe en Brión “o esforzo e a firme aposta do Goberno de Pedro Sánchez por mellorar os servizos e as prestacións no rural para eliminar a fenda dixital e ofrecer igualdade de oportunidades a toda a cidadanía”
Con este programa, cada semana persoal técnico da Administración desprázase aos municipios da provincia para que os seus habitantes poidan realizar xestións administrativas como obter o certificado dixital, coñecer a vida laboral, renovar o carné de conducir ou informarse sobre programas de emprego ou vivenda.
Durante a súa visita ao municipio María Rivas explicou que a próxima semana o programa finalizará o seu percorrido pola provincia tras visitar 67 concellos da provincia. En total durante estes meses participaron neste programa un total de 1.085 persoas e tramitáronse 894 certificados dixitais.
María Rivas comprobou a boa acollida desta iniciativa entre as veciñas e veciños que se achegaron ata o centro social para tramitar o seu certificado e aprender a realizar outras xestións.
A subdelegada do Goberno adiantou que nos próximos meses porase en marcha a segunda fase deste programa, no que serán os propios concellos os que en función da demanda dos seus veciños e veciñas solicitarán determinados trámites. A Administración neste caso porá ao seu dispor funcionarios que se trasladarán ao municipio para realizalos. Na provincia da Coruña hai xa 17 concellos adheridos ao programa.
Coa “Administración preto de ti” o Goberno combate a fenda dixital e “fortalece a cohesión social ofrecendo unha administración máis próxima e útil”, sinalou María Rivas, que agradeceu o esforzo e dedicación dos funcionarios e funcionarias da Subdelegación do Goberno para chegar aos 67 concellos da provincia con menos de 8.000 habitantes.
Aínda que na actualidade as novas tecnoloxías permiten aos cidadáns acceder a multitude de trámites en liña e procedementos electrónicos, este acceso á administración dixital “require de medios e coñecementos adecuados no uso de ferramentas tecnolóxicas, algo que a parte da poboación de maior idade resúltalle máis difícil” polo que programas como o que hoxe chegou ata Brión axudan a resolver gran parte destas dificultades.
A subdelegada incidiu no compromiso do Goberno de España cos concellos do rural, resaltando que o reto demográfico é un dos seus principais eixos de actuación. “Buscamos que o Estado estea máis presente no territorio e, en particular, nos municipios menos poboados, para que ninguén quede atrás”, finalizou.
A Administración preto de ti” é un programa posto en funcionamento polo Ministerio de Política Territorial coa colaboración da Federación Española de Municipios e Provincias
.