A DXT desenvolve desde mañá en Galicia unha campaña especial de vixilancia de camións e autobuses
29/01/2023
Os controis realizaranse ata o domingo, 5 e prestarán especial atención ás condicións técnicas do vehículo, a velocidade ou a seguridade da carga transportada
Na mesma campaña do pasado ano controláronse en Galicia 3.295 vehículos
Segundo os datos do Ministerio de Transportes, só en Galicia hai máis de 15.500 empresas autorizadas para transporte de *mercancias e de viaxeiros por estrada
A Dirección Xeral de Tráfico comezará mañá unha campaña especial de vixilancia de camións e autobuses nas estradas de Galicia. Ao longo da semana, os axentes da Agrupación de Tráfico da Garda Civil intensificarán os controis sobre este tipo de vehículos nas estradas galegas, contando coa colaboración de numerosas policías locais, que tamén se suman á mesma.
Para o desenvolvemento da campaña, que estará coordinada polas xefaturas provinciais de tráfico, utilizaranse o máximo número de medios humanos e materiais dispoñibles. Ademais, sempre que sexa posible, advertirase aos condutores da existencia próxima de controis, tanto a través dos paneis de sinalización variable como das pantallas alfanuméricas dos vehículos da Agrupación de Tráfico situadas nas inmediacións.
Os axentes farán especial incidencia en verificar aspectos como as condicións técnicas e os elementos de seguridade do vehículo, o seu peso, o acondicionamento da carga, o estado dos pneumáticos ou o adecuado funcionamento da iluminación.
Realizarán ademais verificacións de carácter administrativo, examinando a documentación do vehículo e o permiso dos condutores; comprobarán os tempos de condución e descanso, así como o consumo de alcol; tamén vixiarán a velocidade e o mantemento da distancia de seguridade.
Esta campaña ten unha especial incidencia en Galicia polo volume de liñas de transporte regular de viaxeiros, transporte escolar e de mercadorías que diariamente circulan polas estradas da Comunidade. Segundo os datos do Ministerio de Transportes, Mobilidade e Axenda Urbana, a xaneiro deste ano en Galicia hai 15.765 empresas autorizadas para realizar #ambos os tipo de transporte, maioritariamente loxísticas de mercadorías.
Ademais, só en Galicia o transporte público de viaxeiros move 2,5 millóns de viaxeiros ao mes, ao que habería que sumar os viaxeiros de buses urbanos, rutas escolares e transporte *discreccional, o que elevaría significativamente esta cifra.
En 2022 en Galicia faleceron tres persoas en tres accidentes relacionados con camións (en Ourense: 2 falecidos en 2 sinistros en camións de máis de 3500kg, e en Lugo: 1 falecido en 1 sinistro nun camión inferior a 3500 kg) e sete persoas nun accidente de autobús producido na provincia de Pontevedra.
Datos de campaña anterior
Durante o sete días de duración desta mesma campaña o pasado ano (entre o 7 e o 13 de febreiro), os axentes da Agrupación de Tráfico da Garda Civil controlaron en Galicia a 3.108 camións e 187 autobuses. Nestes controis resultaron denunciados 759 condutores de camións e 22, de autobuses por non cumprir algúns dos preceptos da normativa de tráfico e seguridade viaria. Estas denuncias materializáronse en 1.067 sancións relacionadas cos camións e 27, vinculadas aos autobuses.
As denuncias por exceso de horas de condución, seguidas por aquelas relacionadas con irregularidades administrativas na documentación ou por exceso de peso e mala disposición da carga, son as máis relevantes.