O Grove subscribe o protocolo de colaboración entre a Garda Civil e a Policía Local para a protección de vítimas de violencia de xénero

06/04/2021

A subdelegada do Goberno en Pontevedra presidiu hoxe a Xunta Local de Seguridade do Concello de O Grove na que se ratificou o novo protocolo de colaboración entre a Garda Civil e a Policía Local no marco do programa de seguimento integral das vítimas de  violencia de xénero –Sistema Vioxén-, subscrito polo alcalde de O Grove, José Cacabelos, e o tenente coronel e xefe accidental da Comandancia da Garda Civil en Pontevedra, Manuel Touceda.

A subdelegada do Goberno, Maica Larriba, presidiu esta mañá a Xunta Local de Seguridade do Concello de O Grove na que se subscribiu o novo protocolo de colaboración entre as Forzas e Corpos de Seguridade do Estado e a Policía Local no marco do programa de Seguimento Integral das Vítimas de Violencia de Xénero. O protocolo de colaboración foi asinado polo alcalde de O Grove, José Cacabelos, e o tenente coronel e xefe accidental da Comandancia da Garda Civil en Pontevedra, Manuel Touceda.

O Grove é o sexto concello da provincia que procede á renovación deste documento, o primeiro trámite e fundamental, que deben formalizar todos aqueles municipios que desexen permanecer dentro do Sistema Vioxén. O novo protocolo recolle o reparto de funcións e asignacións de vítimas entre as Forzas e Corpos de Seguridade e adecúase ás referencias normativas actuais.

Maica Larriba quixo agradecer “o compromiso do Concello de O Grove e do seu equipo de Goberno, que hoxe converteu a este municipio no sexto da provincia en renovar o protocolo do Sistema VioXén, así como o fundamental labor que desenvolve a Garda Civil na protección e asistencia a todas as mulleres vítimas de malos tratos neste concello e na provincia”. A subdelegada lembrou a importancia de renovar estes acordos para que “as forzas e corpos de seguridade local e estatal poidan compartir información e recursos e establecer uns criterios básicos de colaboración e coordinación, de xeito que se garanta o cumprimento eficaz das medidas xudiciais de protección ás vítimas de violencia de xénero”.

En particular, o novo protocolo delimita as funcións da Policía Local no ámbito da violencia de xénero e define o seguimento e reparto dos casos, o que “permite sumar máis efectivos e recursos á protección das vítimas", recalcou Larriba. A subdelegada adiantou que outros concellos da provincia tamén procederán a súa renovación ou adhesión proximamente. Do mesmo xeito, Larriba lembrou “o firme compromiso do actual Goberno de España e desta Subdelegación coa erradicación de cal quera forma de violencia contra a muller”.

Por último, José Cacabelos agradeceu a colaboración da Subdelegada do Goberno e da Garda Civil nun ámbito “tan importante para nós como é o da violencia machista”. O alcalde de O Grove amosou a súa preocupación polo alto número de casos de violencia de xénero activos na vila -14-. “É unha cifra moi alta que non podemos permitir. Estas situacións son intolerables e temos que traballar todos e todas conxuntamente para evitalas, incidindo non só na protección, senón tamén na prevención e na educación –en igualdade e en feminismo-.  Só así podemos agardar que no futuro non sexa necesario renovar este tipo de convenios xa que o dato estatístico será cero. Esta é a cifra que queremos acadar”, asegurou. Así mesmo, o alcalde de O Grove quixo agradecer o traballo desenvolvido pola Subdelegación do Goberno e a Garda Civil durante os últimos meses no control das medidas de prevención e contención da crise sanitaria.

Para completar a súa adhesión, o Concello deberá asinar agora o convenio co Ministerio do Interior para o acceso ao Sistema de Seguimento Integral en casos de violencia de xénero.

Segundo os datos recollidos no Sistema VioXén, en O Grove contabilízanse a día de hoxe 14 casos activos de violencia de xénero. Esta cifra supón case o 1,22 % dos casos activos na provincia de Pontevedra e o 15,90 % dos casos activos en todo o partido xudicial, que aglutina o 6,28 % das denuncias rexistradas na provincia no 2020. O 78,6 % das vítimas da localidade ten menos de 45 anos.

O Sistema VioXén

O Sistema VioXén foi posto en funcionamento no ano 2007 pola Secretaría de Estado de Seguridade do Ministerio de Interior co obxectivo de establecer unha rede nacional que permita o  seguimento e protección de forma rápida, integral e efectiva das mulleres vítimas de malos tratos, e dos seus fillos e fillas, en calquera parte do territorio español, así como de aglutinar ás institucións públicas competentes na materia de violencia de xénero e integrar a información dos diferentes casos.

O Sistema tamén realiza predicións do risco de calquera vítima e, en función dese nivel, efectúa un seguimento e protección adecuado da muller que se trate en todo o territorio nacional. Vioxén desenvolve ademais un labor preventivo con avisos, alertas e alarmas cando se detecta algunha incidencia ou acontecemento que pode poñer en risco a integridade da vítima.