O subdelegado do Goberno e o Director de Produción do SIEPSE visitan as instalacións onde se emprazará a Unidade de Custodia Hospitalaria

O subdelegado do Goberno e o Director de Produción do SIEPSE visitan as instalacións onde se emprazará a Unidade de Custodia Hospitalaria

18/06/2020

Trátase dunha obra moi demandada dende o peche da anterior unidade no Hospital Santa María Nai a finais do ano 2016

Emilio González quixo agradecer a colaboración e o impulso dado a este proxecto dende o Centro Penitenciario de Pereiro de Aguiar e dende a Xerencia Hospitalaria do CHUO


O subdelegado do Goberno en Ourense, Emilio González Afonso, e o Director de Produción da Sociedade de Infraestruturas e Equipamentos Penitenciarios e da Seguridade do Estado (SIEPSE), Juan José Torrejón, realizaron durante a mañá de hoxe unha visita ás instalacións do Complexo Hospitalario Universitario de Ourense (CHUO) nas que se vai emprazar a Unidade de Custodia Hospitalaria (UCH).

Durante a visita, previa á formalización da acta de replanteo, estiveron acompañados polo Xerente da Área Sanitaria de Ourense, Verín e Valdeorras, Félix Rubial; polo Director do Centro Penitenciario de Pereiro de Aguiar, Francisco González; pola Administradora do Centro Penitenciario, Lorena del Pozo; e polo presidente de EXTRACO, Pablo Prada, empresa encargada das obras.

As obras da Unidade de Custodia Hospitalaria (UCH) comezarán nos vindeiros días e teñen un prazo de execución de cinco meses, ascendendo o seu valor a 370.016,79 euros (impostos engadidos).

O subdelegado do Goberno sinalou que se trata dunha obra que permitirá tanto a mellora da atención hospitalaria aos internos do Centro Penitenciario de Pereiro de Aguiar como do traballo dos sanitarios e dos axentes dos Corpos e Forzas de Seguridade do Estado encargados da súa custodia.

Emilio González quixo agradecer a colaboración e o impulso dado a este proxecto dende a Secretaría Xeral de Institucións Penitenciarias, dende o Centro Penitenciario de Pereiro de Aguiar e dende a Xerencia Hospitalaria do CHUO. O subdelegado do Goberno sinalou que se trata dunha obra moi demandada, posto que a unidade existente anteriormente no Hospital Santa María Nai quedou fóra de servizo a finais do ano 2016 coa reforma hospitalaria e o traslado aos novos edificios

Igualmente, o Xerente do CHUO, Félix Rubial, agradeceu a colaboración do Ministerio do Interior para o impulso desta Unidade de Custodia Hospitalaria, indicando que mellorará a prestación de servizos sanitarios no Centro Hospitalario.

UNIDADE DE CUSTODIA HOSPITALARIA DO CHUO

A Unidade de Custodia Hospitalaria do CHUO constará dun total de catro habitacións, dunha sala de espera, dunha sala de control para o Corpo de Seguridade, aseos e duchas, sendo a superficie total de 218 metros cadrados.

A Unidade contará con modernos sistemas de seguridade que permitirán o control dos internos e das visitas, garantindo a máxima seguridade e independencia respecto ao resto de zonas do Complexo hospitalario. En todo momento o enfermo está en comunicación co posto de enfermería e co posto de control das Forzas de Seguridade do Estado que o custodian.

A peculiaridade destas áreas de Custodia Hospitalaria fai que sexa preciso combinar a operatividade coa seguridade. O emprazamento da Unidade dentro do hospital e os mínimos detalles precisos para a asistencia sanitaria son estudados pola SIEPSE co obxecto de que non interfiran no desenvolvemento da actividade cotiá do centro hospitalario, ao tempo que se garante aos internos contar con todas as asistencias sanitarias sen necesidade de ser trasladados a outras plantas.