Inicio > Delegaciones > Delegaciones del Gobierno > Delegación del Gobierno en la Comunidad Autónoma de Galicia > Actualidad > Notas de Prensa > Notas > 2022 > Agosto > Maica Larriba sinala que os ciberdelitos xa supoñen en Cangas unha de cada tres denuncias

Maica Larriba sinala que os ciberdelitos xa supoñen en Cangas unha de cada tres denuncias

22/08/2022

Na reunión tamén se promoveron e coordinaron as medidas dirixidas a garantir a seguridade na localidade durante as Festas do Cristo.

Pontevedra, 22 de agosto de 2022.- A subdelegada do Goberno en Pontevedra, Maica Larriba, presidiu esta mañá a Xunta Local de Seguridade do Concello de Cangas, xunto a alcaldesa, Victoria Portas. Tamén asistiu o tenente coronel da Garda Civil, Manuel Touceda, e outros responsables do corpo, así como a xefa provincial de Tráfico, Paula Yubero, e membros da Policía Local e da seguridade municipal. No encontro analizáronse as cifras de delincuencia e infraccións penais rexistradas no municipio durante o que vai de ano. A subdelegada do Goberno sinalou que en Cangas -como sucede no resto da provincia- se detecta un incremento dos ciberdelitos, que supoñen xa unha de cada tres denuncias rexistradas na capital comarcal do Morrazo. Tal e como transmitiron os responsables policiais presentes na Xunta, estes delitos continúan a crecer mes a mes en toda a provincia e lastran as cifras xerais de infraccións penais do concello.

Polo seu lado, a alcaldesa recalcou que a percepción de seguridade en Cangas durante este verán está a ser grande, aínda que se detecta un lixeiro repunte das infraccións habituais como lesións e ameazas debidas a rifas, en moitas ocasións vinculadas ao ocio nocturno. Con todo, trátase dun incremento que entra dentro da normalidade tras a volta á actividade total da cidadanía tras a pandemia.

Na reunión tamén se promoveron e coordinaron as medidas dirixidas a garantir a seguridade na localidade durante as Festas do Cristo que se celebran do 27 de agosto ao 3 de setembro. Maica Larriba supervisou os operativos necesarios para o bo desenvolvemento destas xornadas de festa, que pasan por establecer unha ampla coordinación entre a Policía Local e a Garda Civil para ofrecer as máximas garantías de seguridade. Tanto a subdelegada como a alcaldesa remarcaron a importancia da coordinación institucional pero apelaron “á responsabilidade individual para que todas e todos poidamos gozar duns festexos seguros”.

Garda Civil e Policía Local coordinaranse nos dispositivos de seguridade cidadá e de Tráfico, con controis de circulación móbiles e aleatroios nos principais accesos e saídas da localidade, dispoñendo de varias patrullas para a realización de controis de alcoholemia e drogas que sirvan de prevención pola posible falta de responsabilidade dalgúns condutores.

Doutra banda, a subdelegada do Goberno puxo en valor e agradeceu a iniciativa do Concello para dispoñer durante as Festas do Cristo dun punto violeta, “pois permite dar maior seguridade ás mulleres e sensibilizar ao público para previr e desfrutar das festas baixo o respecto ás mulleres”

Fondeo na ría de Aldán
A Xunta Local de Seguridade foi aproveitada polo Concello para solicitar a colaboración da Garda Civil na vixilancia do fondeo de embarcacións na ría de Aldán. Malia non estar permitido pola normativa, a ría convertiuse nos últimos veráns nun espazo habitual de fondeo para embarcacións de recreo. A Garda Civil comprometeuse a manter a vixilancia e a dar aviso ao servizo marítimo cando se detecten atraques irregulares.